Маусым қорытындысы. Алматы

Pro Hokei Ligasy кезекті маусымындағы командалардың өнерін қорытындылауды жалғастырамыз. Бүгін сөз «Алматы» командасы туралы болмақ.

Нәтиже

Оңтүстікастаналық команда маусымды біркелкі өткізбесе де, қатарынан екінші рет плей-офф кезеңіне жолдама алып, онда алматылықтар басты сенсациялардың біріне айнала жаздады. Тұрақты чемпионатта команда 20 жеңіске қол жеткізіп, мүмкін болған ұпайлардың шамамен 43%-ын жинады. Сегізінші орыннан жоғары көтерілуге ақпан айындағы сәтсіз кезең кедергі болды: сол уақытта «Алматы» 10 матчтың тек үшеуінде ғана жеңіске жетті.

Оқиғалар

Ширек финалда сол кезде құрамы біршама қысқарған «Алматы» маусымның басты фавориті саналатын «Номадты» жүлде үшін күрестен шығарып, өз тарихында алғаш рет плей-оффтың екінші кезеңіне шығуға бір қадам қалды. Оның үстіне, сериядағы есеп 3:2 болған кездегі алтыншы матч дәл оңтүстік астанада өтті. Алайда сенсация орын алған жоқ – «көшпенділер» қатарынан екі жеңіске жетті, ал соңғы кездесу тіпті ірі есеппен аяқталды.

Көшбасшылар

Команда сапында бірден үш ойыншы 30 ұпайлық межеден асты. Дегенмен, маусымның басты жаңалығы ретінде Муса Гусейновты атауға толық негіз бар. Ол команданың үздік бомбардирі әрі мергені атанып, 23 гол соғып, 23 нәтижелі пас берді (23+23). Сонымен қатар шабуылшы маусымдағы барлық 61 матчқа қатысты. «Алматының» үздік ассистенті Диас Атаханов та айтарлықтай прогреске қол жеткізді: ол 60 ойында 11 шайба соғып, 30 нәтижелі паспен (11+30) көзге түсті.

Цитата

– Мен бәрібір жігіттерімізді мақтан тұтамын, – деп маусымды қорытындылады «Алматының» бас бапкері Александр Нестеров. – Плей-оффта біз қиын жағдайға тап болдық: негізгі құрамның үш ойыншысы жарақат салдарынан қатардан шықты. Жалпы, соңғы матчты есептемегенде, «Номадпен» өткен серия маған ұнады. Қозғалыс жағынан қарсыластан қатты қалып қойдық деп айта алмаймын, бірақ кей сәттерде шешуші сәттерде дұрыс шешім қабылдай алмадық.

Қорытынды

Үш сәтсіз маусымнан кейін «Алматы» плей-офф қатысушыларының қатарынан берік орын алды. Алайда құрам тереңдігінің жеткіліксіздігі мен негізгі ойыншылардың жарақаттары командаға өз тарихындағы ең үздік нәтижені көрсетуге мүмкіндік бермеді. Клуб басшылығын алда ауқымды трансферлік жұмыс күтіп тұрғаны анық. Ал жанкүйерлерді, сондай-ақ көптеген сарапшыларды бір сұрақ толғандырады: клубтың нағыз аңызына айналған тәжірибелі қорғаушы Сергей Машинец кәсіби мансабын жалғастыра ма?

ВКонтакте, Инстаграм < Бізге қосылып, Pro Hokei Ligasy жаңалықтарын өзіңізге ыңғайлы платформалардан оқыңыз.